ᐊᐱᖅᑯᑎᒋᔭᐅᒡᒍᔪᑦ - ᑲᓐᖑᓇᕐᑐᖁᑏᑦ

ᐱᖁᔭᖅ ᐱᒋᐊᓚᐅᕐᓯᒪᔪᖅ ᓄᓇᑦᓯᐊᑉ ᒐᕙᒪᒃᑯᖏᓐᓂ ᑎᓯᐱᒻᒪ 31, 1996ᖑᑎᓪᓗᒍ ᐊᒻᒪ ᓄᓇᕗᒥ ᐊᑐᕆᐊᓕᕐᑐᓂ ᐅᓪᓗᖓᓂ ᓄᓇᑦᓯᐊᖅ ᐊᕕᒻᒪᑦ.  ᐊᑐᖅᑕᐅᒋᐊᓕᒃ ᑕᒪᐃᓐᓄᓕᒫᖅ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ ᑎᒥᖁᑎᖏᓐᓄᓪᓗ, ᑲᑎᒪᔨᓄᑦ ᑲᒥᓴᓇᓄᓪᓗ, ᐊᕉᕋ ᓯᓚᒃᑐᓴᕐᕕᖓᑦ ᐱᖃᑕᐅᓗᓂ.

"ᐃᒻᒥᒦᓐᖔᕐᑐᑦ ᑐᓴᒐᒃᓴᑦ" ᑐᑭᓕᒃ ᑐᓴᒐᒃᓴᑦ ᑎᑎᕋᕐᑕᐅᓂᑯᑦ ᐃᕝᕕᑦ ᒥᒃᓵᓄᑦ ᐅᓂᒃᑳᓖᑦ.  ᐱᖃᓯᐅᔾᔨᓯᒪᑐᐃᓐᓇᕆᐊᓖᑦ ᐊᑎᕐᖕᓂᒃ, ᑐᕌᕈᑎᓐᓂᒃ, ᐊᕐᓇᐅᒻᒪᖔᕐᐱᑦ ᐊᖑᓪᓘᓐᓃᑦ, ᐅᑭᐅᑎᑦ, ᐃᓕᓐᓂᐊᕐᓯᒪᓃᑦ, ᐋᓐᓂᐊᕐᕕᒻᒥ ᖃᐅᔨᓴᕐᑕᐅᖃᑦᑕᕐᓂᑯᑎᑦ ᐃᖅᑲᓇᐃᔮᕆᓯᒪᔭᑎᓪᓗ ᐅᓂᒃᑳᖏᑦ - ᐊᓯᓕᒫᖏᓪᓗ ᐃᓕᓐᓂᒃ ᐅᓂᒃᑳᓖᑦ.

ᒐᕙᒪᒃᑯᑦ ᐱᓕᕆᕝᕕᖏᑦ ᓄᐊᑦᓯᔪᓐᓇᕐᑐᑦ ᐃᕝᕕᑦ ᑐᓴᒐᒃᓴᖁᑎᖏᓐᓂᒃ ᓄᐊᑦᓯᒋᐊᖃᕐᐸᑕ ᒐᕙᒪᒃᑯᑦ ᐱᔨᒃᓯᕈᑎᒋᕙᑦᑕᖏᓐᓄᑦ ᐊᑑᑎᖃᕐᓂᐊᕐᐸᑦ.  ᐃᒻᒥᒥᓐᖔᕐᑐᑦ ᑐᓴᒐᒃᓴᓂᑦ ᑭᐅᓚᐅᕐᓯᒪᓂᑰᒍᕕᑦ ᑕᑕᑎᕆᐊᓕᓐᓂᒃ ᐊᐱᖅᑯᑎᓂᒃ ᑭᐅᑐᐊᕋᕕᒋᑦ ᒐᕙᒪᒃᑯᑦ ᐱᓕᕆᕝᕕᖓᑕ ᐱᓕᕆᐊᒃᓴᖏᓐᓄᑦ ᐱᔨᒃᓯᕈᑎᖏᓐᓄᓪᓗ ᑐᕌᖓᑐᐊᖅᐸᑦ ᐱᓯᒪᔭᐅᓕᕐᓂᐊᕐᖓᑕ, ᓲᕐᓗ ᐊᖁᑦᑐᖅᓯᐅᑏᑦ ᐃᓪᓗᒧᓪᓘᓐᓃᑦ ᐱᔪᓐᓇᐅᑎᑖᕐᓂᕈᕕᑦ.

ᐱᖁᔭᕐᔪᐊᖅ ᐊᖅᑯᑕᐅᓪᓗᓂ ᒐᕙᒪᒃᑯᑦ ᑎᒥᖁᑎᖏᑦ ᓴᐳᒻᒥᐅᓯᖅᓯᓯᒪᔭᕆᐊᖃᖅᐳᑦ ᐃᒻᒥᒧᑦ ᑐᕌᖓᔪᓂᒃ ᑐᓴᐅᒪᔾᔪᑎᓂᒃ ᐸᐸᑕᖏᓐᓂᒃ.  ᒪᓕᒐᖅᑕᖃᐅᖅᑐᖅ ᖃᓄᖅ ᐃᒻᒥᒧᑦ ᑐᕌᖓᔪᑦ ᑐᓴᐅᒪᔾᔪᑏᑦ ᑲᑎᖅᓱᖅᑕᐅᔪᓐᓇᕐᒪᖔᖏᑦ, ᐊᑐᖅᑕᐅᔪᓐᓇᕐᒪᖔᖏᑦ, ᐸᐸᑕᐅᔪᓐᓇᕐᒪᖔᖏᑦ, ᓴᖅᑭᑕᐅᔪᓐᓇᕐᒪᖔᖏᑦ ᐊᒻᒪᓗ ᓴᒃᑯᑕᐅᔪᓐᓇᕐᒪᖔᖏᑦ ᐃᒻᒥᒧᑦ ᑐᕌᖓᔪᑦ ᑐᓴᐅᒪᔾᔪᑏᑦ.

ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᑦ ᐃᓕᖕᓂᒃ ᖃᐅᔨᒃᑲᐃᔭᕆᐊᖃᖅᐳᑦ ᑐᓴᐅᒪᔾᔪᑎᓂᒃ ᑲᑎᖅᓱᖅᓯᒪᔭᕐᒥᓂᒃ ᐊᑐᕈᒪᓂᐊᕈᑎᒃ.  ᐊᑦᑎᖅᓯᒪᔭᕆᐊᖃᖅᐳᑦ ᐃᓄᖕᒥᒃ ᑎᒥᖁᑖᑕ ᐃᓗᐊᓂ ᐃᖅᑲᓇᐃᔭᖅᑎᒥᒃ ᐊᐱᖅᑯᑎᒃᓴᖃᕐᓂᕈᕕᑦ ᑭᐅᔪᓐᓇᖅᑐᒥᒃ ᖃᓄᖅ ᑕᒪᒃᑯᐊ ᐃᒻᒥᒨᖓᔪᑦ ᐊᑐᖅᑕᐅᓂᐊᕐᒪᖔᖏᓐᓄᑦ.

ᐃᒻᒥᒧᑦ ᑐᕌᖓᔪᑦ ᑐᓴᐅᒪᔾᔪᑏᑦ ᐊᑐᐃᓐᓇᕈᖅᑎᑕᐅᔪᓐᓇᖅᐳᑦ ᑕᐃᒃᑯᓄᖓ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᓐᓄᑦ ᐃᖅᑲᓇᐃᔭᖅᑎᓄᑦ ᐊᑐᕐᓂᐊᖅᐸᑕ ᑭᓯᐊᓂ ᐃᖅᑲᓇᐃᔮᖓᑕ ᒥᒃᓵᓄᑦ.

ᐃᓚᖏᓐᓂ ᒐᕙᒪᒃᑯᑦ ᐸᐸᑕᖏᓐᓃᑦᑐᖃᖃᑦᑕᖅᑐᖅ ᑐᓴᐅᒪᔾᔪᑎᓂᒃ ᐃᒻᒥᒧᑦ ᑐᕌᖓᔪᓂᒃ ᑕᖅᑲᒃᑯᓄᖓ ᑭᒃᑯᑐᐃᓐᓇᕐᓄᑦ ᑕᑯᔭᐅᔪᓐᓇᖅᑐᓂᒃ.  ᐆᒃᑑᑎᒋᔪᓐᓇᖅᑕᕗᑦ ᓄᓇᐃᑦ ᐊᑎᓕᐅᖅᑕᐅᓯᒪᓂᖏᑦᑕ ᑎᑎᖅᑲᖁᑎᖏᑦ ᐊᒻᒪᓗ ᓄᓇᐃᑦ ᑖᒃᓰᔭᐅᑎᖏᓐᓄᑦ ᑐᕌᖓᔪᑦ ᑎᑎᖅᑲᖁᑏᑦ.

ᐃᓕᖕᓅᖓᔪᓂᒃ ᐃᓗᐃᒃᑲᓂᒃ ᐸᐸᑕᐅᔪᓂᒃ ᑎᑎᖅᑲᖁᑎᓂᒃ ᐱᑕᖃᓐᖏᑦᑐᖅ.  ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᓐᓂᒃ ᐱᓕᕆᖃᑎᖃᕈᕕᑦ, ᐃᓕᖕᓄᑦ ᑐᕌᖓᔪᓂᒃ ᑐᓴᐅᒪᔾᔪᑎᓂᒃ ᐱᓯᒪᔪᒃᓴᐅᔪᑦ.  ᐆᒃᑑᑎᒋᓗᒍ, ᐃᖏᕐᕋᔾᔪᑎᓕᕆᔨᒃᑯᑦ ᐊᖁᔾᔪᑎᖕᓅᖓᔪᓂᒃ ᑐᓴᐅᒪᔾᔪᑎᓂᒃ ᐱᓯᒪᔪᑦ, ᐃᓕᓐᓂᐊᖅᑐᓕᕆᔨᒃᑯᓪᓗ ᑲᑎᒪᔨᖏᑦ ᕿᑐᕐᖓᕕᑦ ᐃᓕᓐᓂᐊᕐᓂᕆᔭᖏᑕ ᒥᒃᓵᓅᖓᔪᓂᒃ ᐱᓯᒪᓪᓗᑎᒃ, ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᔨᒃᑯᑦ ᐃᓄᓕᕆᔨᒃᑯᓪᓗ ᐱᓯᒪᓪᓗᑎᒃ ᓘᒃᑖᓕᐊᖃᑦᑕᕈᓯᕕᓂᕐᓅᖓᔪᓂᒃ.

ᐊᑐᖅᑕᐅᒡᒍᔪᓂ, ᐱᖁᔭᕐᔪᐊᖅ ᐊᖅᑯᑕᐅᓪᓗᓂ ᐱᔪᓐᓇᐅᑎᖃᖅᐳᑎᑦ ᐃᓕᖕᓅᖓᔪᓂᒃ ᑐᓴᐅᒪᔾᔪᑎᓂᒃ ᒐᕙᒪᒃᑯᑦ ᑎᒥᖁᑎᒋᔭᖏᓐᓂ ᐱᔭᐅᓯᒪᔪᓂᒃ ᑕᑯᔪᒪᔪᓐᓇᕐᓂᕐᒥᒃ.  ᐊᒥᓱᐊᖅᑕᖅ, ᐃᒻᒥᒧᑦ ᑐᕌᖓᔪᓂᒃ ᑐᓴᐅᒪᔾᔪᑎᓂᒃ ᐱᔪᓐᓇᖅᑐᑎᑦ ᐅᖄᓚᑐᐃᓐᓇᕐᓗᑎᑦ, ᑎᑎᕋᑐᐃᓐᓇᕐᓗᑎᑦ ᐅᕝᕙᓘᓐᓃᑦ ᒐᕙᒪᒃᑯᑦ ᑎᒥᖁᑖ ᑕᑯᔭᖅᑐᑐᐃᓐᓇᕐᓗᒍ.  (ᑐᕌᕈᑖᓂᒃ ᐅᖄᓚᐅᑎᐊᓂᒡᓘᓐᓃᑦ ᓇᓗᒍᕕᑦ, ᐅᖄᓚᐅᑎᓯᐅᑏᑦ ᐃᓗᓕᖏᓐᓃᑦᑐᑦ ᑐᖑᔪᖅᑕᑦ ᖃᐅᔨᒋᐊᕐᕕᒋᔪᓐᓇᖅᑕᑎᑦ).

ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖓ ᑐᓴᐅᒪᔾᔪᑎᓂᒃ ᐸᐸᑦᑎᔪᖅ ᖃᐅᔨᒋᐊᕐᕕᒋᓗᒍ ᐊᒻᒪᓗ ᓇᓗᓇᐃᖅᓯᕕᒋᓗᒋᑦ ᐃᒻᒥᒧᑦ ᑐᕌᖓᔪᓃᑦᑐᒥᒃ ᑕᒻᒪᖅᓯᒪᔪᒥᒃ ᐋᖅᑭᒋᐊᖅᓯᔪᒪᓂᕋᕐᓗᑎᑦ.  ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖓ ᐃᒻᒥᒧᑦ ᑐᕌᖓᔪᓂᒃ ᑕᒻᒪᖅᓯᒪᔪᓂᒃ ᐋᖅᑭᒋᐊᖁᔨᓐᖏᑉᐸᑦ, ᐸᐃᑉᐹᖁᑎᖕᓄᑦ ᐃᓕᓯᖁᔨᔪᓐᓇᖅᑐᑎᑦ ᐅᖃᐅᔾᔭᐅᓃᑦ ᐊᖏᖃᑎᒋᓐᖏᓐᓂᕋᖅᓯᒪᔪᓂᒃ ᐃᓕᓯᕕᐅᖁᓗᒍ.

ᑐᓴᐅᒪᔾᔪᑏᑦ ᐱᔪᒪᔭᑎᑦ ᐱᔪᓐᓇᓐᖏᒃᑯᕕᒋᑦ, ᐅᕝᕙᓘᓐᓃᑦ ᐃᒻᒥᒧᑦ ᑐᕌᖓᔪᑦ ᑐᓴᐅᒪᔾᔪᑏᑦ ᑕᒻᒪᖅᓯᒪᔪᑦ ᐋᖅᑭᒋᐊᖅᑕᐅᖁᔭᐅᓐᖏᑉᐸᑕ, ᑐᓴᐅᒪᔾᔪᑎᓂᒃ ᑐᒃᓯᕋᐅᑏᑦ ᑕᑕᑎᕈᑎᖏᓐᓂᒃ ᑕᑕᑎᕆᔪᓐᓇᖅᑐᑎᑦ.

ᐋᒃᑲᕈᓗᒃ.  ᐅᑯᐊ ᒪᓕᑐᐃᓐᓇᕐᓗᒋᑦ:

ᓯᕗᓪᓕᖅ 1: ᑐᒃᓯᕋᐅᑏᑦ ᑕᑕᑎᕈᑎᖏᓐᓂᒃ ᑕᑕᑎᕆᓗᑎᑦ, ᐅᕝᕙᓘᓐᓃᑦ ᑎᑎᕋᕐᓗᑎᑦ ᐅᖃᖅᓯᒪᔪᓂᒃ ᑐᓴᐅᒪᔾᔪᑎᓂᒃ ᐱᔪᒪᓂᕋᕐᓗᑎᑦ ᐅᕝᕙᓘᓐᓃᑦ ᐃᒻᒥᒧᑦ ᑐᕌᖓᔪᑦ ᑕᒻᒪᖅᓯᒪᔪᓂᒃ ᐋᖅᑭᒋᐊᖅᓯᔪᒪᓗᑎᑦ ᐱᖁᔭᕐᔪᐊᑉ ᐃᓗᓕᖏᑦ ᒪᓕᒡᓗᒋᑦ.  (ᑐᒃᓯᕋᐅᑏᑦ ᑕᑕᑎᕈᑎᖏᑦ ᖃᕆᓴᐅᔭᒃᑯᑦ ᐱᔪᓐᓇᖅᑕᑎᑦ ᐊᒻᒪᓗ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᓐᓂᒃ ᓄᓇᕗᒻᒥ ᓇᓂᑐᐃᓐᓇᖅ).

ᑐᒡᓕᐊ 2: ᑕᑕᑎᖅᓯᒪᔪᑦ ᑎᑎᕋᖅᑕᑎᓪᓘᓐᓃᑦ “ᑐᓴᐅᒪᔾᔪᑎᓂᒃ ᐊᑐᐃᓐᓇᖃᕐᓂᖅ ᐃᒻᒥᒧᓪᓗ ᑐᕌᖓᔪᓂᒃ ᓴᐅᒻᒥᐅᓯᖅᓯᓯᒪᓂᕐᒧᑦ ᑐᑭᒧᐊᒃᑎᑦᑎᒡᒧᑦ”ᐊᐅᓪᓚᖅᑎᓪᓗᒋᑦ ᐱᓕᕆᕝᕕᖕᒧᑦ ᐃᓕᖕᓅᖓᔪᓂᒃ ᐱᓯᒪᔪᒥᓇᕐᓂᖅᐹᓄᑦ.

ᐃᒻᒥᒧᑦ ᑐᕌᖓᔪᓂᒃ ᑐᒃᓯᕋᐅᑎᓂᒃ ᑐᒃᓯᕌᖃᕐᓗᓂ ᐊᑭᓖᔭᕆᐊᖃᒡᒍᓐᖏᑦᑐᑦ.  ᑕᐃᒪᐃᒃᑲᓗᐊᖅᑎᓪᓗᒍ, ᑐᒃᓯᕋᐅᑏᑦ ᖃᓄᖅ ᐱᔭᕐᓂᓐᖏᑎᒋᖕᒪᖔᖓ ᐊᒻᒪᓗ ᖃᔅᓯᓂᒃ ᑐᒃᓯᕌᖃᕐᓃᑦ ᒪᓕᒡᓗᒍ, ᐊᑭᓖᑎᑕᐅᑐᐃᓐᓇᕆᐊᖃᖅᑐᑎᑦ ᕿᓂᕐᓂᖏᓐᓄᑦ ᐸᐃᑉᐹᖁᑎᓂᒡᓗ ᐃᓕᖕᓅᖓᔪᓂᒃ ᐋᖅᑭᒃᓱᐃᓂᕐᓄᑦ ᐊᒻᒪᓗ ᐅᓄᖅᓯᑎᑕᐅᓂᖏᓐᓄᑦ ᖃᖓᑦᑕᐅᑎᖏᓐᓄᓪᓗ.

ᒐᕙᒪᒃᑯᑦ ᑎᒥᖁᑎᖏᑦ ᑐᒃᓯᕋᕐᕕᐅᔪᑦ ᐱᖁᔭᕐᔪᐊᖅᑎᒍᑦ ᑭᐅᔭᕆᐊᓖᑦ ᐅᓪᓗᖅᓯᐅᑏᑦ ᐅᓪᓗᖏᑦ 30 ᑐᖔᓂ ᑐᒃᓯᕌᖅ ᐱᓚᐅᖅᑎᓪᓗᓂᐅᒃ.

ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖓ ᑕᑯᖅᑯᔾᔨᓐᖏᑉᐸᑕ ᐅᕝᕙᓘᓐᓃᑦ ᐃᓕᖕᓅᖓᔪᑦ ᑐᓴᐅᒪᔾᔪᑏᑦ ᑕᒻᒪᖅᓯᒪᔪᑦ ᐋᖅᑭᒋᐊᖅᑕᐅᖁᔭᐅᓐᖏᑉᐸᑕ, ᐱᔪᓐᓇᐅᑎᖃᖅᐳᑎᑦ ᐊᐱᕆᓗᒍ ᑐᓴᒐᒃᓴᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᕿᒥᕐᕈᓇᖁᓗᒍ ᐃᓱᒪᓕᐊᕕᓂᕐᒥᒃ.  ᕿᒥᕐᕈᓇᖁᔨᓗᓂ ᑲᒥᓴᓇᒥᒃ ᐊᑭᖃᓐᖏᑦᑐᖅ.