ᑲᒥᓴᓇᐅᑉ ᒥᒃᓵᓄᑦ ᐅᓂᒃᑳᑦ

information privacy commissioner ᐃᓚᐃᓐ ᑮᓇᓐ ᐸᓐᔅ ᐊᑯᓂᐊᓗᒃ ᐅᑭᐅᖅᑕᖅᑐᒥᐅᑕᐅᓕᖅᑐᖅ, ᔭᓗᓇᐃᕝᒧᑦ ᐊᑦᒪᓐᑕᒥᑦ ᓄᒃᑎᓚᐅᖅᓯᒪᓪᓗᓂ ᐃᓚᓂ ᐱᖃᑎᒋᓪᓗᓂᒋᑦ 1970-ᐅᑎᓪᓗᒍ. ᐊᑦᑎᖕᓂᖅᓴᓂ ᖁᕝᕙᓯᖕᓂᖅᓴᓂᓗ ᐃᓕᓐᓂᐊᕌᓂᓚᐅᖅᓯᒪᔪᖅ ᓴᐃᓐ ᐹᑐᓕᒃ ᐃᓕᓐᓂᐊᕐᕕᒡᔪᐊᖓᓂ ᔭᓗᓇᐃᕝᒥ, ᐱᔭᕇᖅᖢᓂ 1976-ᖑᑎᓪᓗᒍ. ᑕᐃᑲᓐᖓᑦ ᐋᓪᐴᑕᐅᑉ ᓯᓚᑦᑐᖅᓴᕐᕕᒡᔪᐊᖓᓄᑦ ᐃᓕᓐᓂᐊᕆᐊᓕᓚᐅᖅᓯᒪᔪᖅ, ᐱᔭᕇᖅᓯᓪᓗᓂᓗ ᒐᕙᒪᓕᕆᓂᕐᒥᒃ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐃᓕᓐᓂᐊᕈᑎᓂᒃ ᐊᒻᒪᓗ ᑭᖑᕐᖓᒍᑦ ᒪᓕᒐᓕᕆᓂᕐᒥᒃ ᐃᓕᓐᓂᐊᕌᓂᓚᐅᖅᓯᒪᓪᓗᓂ 1982-ᖑᑎᓪᓗᒍ. ᔭᓗᓇᐃᕝᒧᑦ ᐅᑎᕋᒥ J.E. Richard-ᑯᓐᓂ ᒪᓕᒐᓕᕆᓂᕐᒥᒃ ᐃᓕᓐᓂᐊᓯᓐᓈ ᐃᖅᑲᓇᐃᔭᓕᓚᐅᖅᓯᒪᓪᓗᓂ, ᒫᓐᓇ ᐊᑎᖅᑖᖅᓯᒪᓕᖅᑐᑦ Peterson Stang & Malakoe. ᑖᒃᑯᓇᓂ ᐱᖓᓱᓄᑦ ᐊᕐᕌᒍᓄᑦ ᐃᖅᑲᓇᐃᔭᓚᐅᖅᓯᒪᔪᖅ, 1988-ᖑᓕᖅᑎᓪᓗᒍ ᓇᖕᒥᓂᖅ ᐱᓯᓂᓯᒥᒃ ᐱᒋᐊᖅᑎᑦᑎᓕᖅᖢᓂ. ᑕᐃᒪᓐᖓᓂᑦ 1988-ᒥ ᓇᖕᒥᓂᖅ ᐱᓯᓂᓯᖃᖅᑐᖅ, ᑲᒪᓪᓗᐊᑕᖃᑦᑕᖅᖢᓂᓗ ᖃᑕᓐᖑᑎᓕᒌᓄᑦ ᓴᐳᔾᔨᔨᐅᓂᕐᒥᒃ ᑐᕌᖓᔪᓂᒃ.

1997-ᖑᑎᓪᓗᒍ, ᑮᓇᓐ ᐸᓐᔅ ᑎᒃᑯᐊᖅᑕᐅᕐᖓᓚᐅᖅᓯᒪᔪᖅ ᓯᕗᓪᓕᐅᓪᓗᓂᓗ ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᓂᕐᒧᑦ ᓄᓇᑦᓯᐊᕐᒧᑦ. ᑕᒪᓐᓇ ᑎᒃᑯᐊᖅᑕᐅᓯᒪᓂᖓ ᐅᖓᕙᕆᐊᖅᑕᐅᓚᐅᖅᓯᒪᔪᖅ ᑕᓪᓕᒪᓄᑦ ᐊᕐᕌᒍᒃᑲᓐᓂᕐᓄᑦ ᔪᓚᐃ 1, 2000-ᐅᑎᓪᓗᒍ. 1999-ᒥ, ᑮᓇᓐ ᐸᓐᔅ ᓯᕗᓪᓕᖅᐹᖑᒋᓪᓗᓂ ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᓐᖑᖅᑎᑕᐅᓚᐅᖅᓯᒪᔪᖅ ᓄᓇᕗᒻᒧᑦ, ᑎᒃᑯᐊᖅᑕᐅᒃᑲᓐᓂᓚᐅᖅᖢᓂᓗ ᑕᓪᓕᒪᓄᑦ ᐊᕐᕌᒍᓄᑦ ᐱᒋᐊᖅᑐᒥ ᐊᒃᑑᐸ 2004-ᒥ.

ᑮᓇᓐ ᐸᓐᔅ ᑲᑎᑎᑕᐅᓯᒪᔪᖅ, ᐱᖓᓱᓂᒡᓗ ᐸᓂᖃᖅᖢᓂ. ᓄᓇᓕᖕᓂ ᐱᓕᕆᕈᓘᔭᐃᓐᓇᖃᑦᑕᖅᑐᖅ ᐊᒻᒪᓗ ᐊᑭᓕᖅᓱᖅᑕᐅᓇᓂ ᐃᑲᕐᕋᕋᓴᖕᓄᑦ ᐃᖅᑲᓇᐃᔭᖅᐸᒃᖢᓂ ᒪᒃᑯᒃᑐᑦ ᐃᖃᐃᔭᐅᑎᖏᓐᓂ, ᐱᓗᐊᖅᖢᒍ ᐃᖃᐃᔭᕐᕕᖕᒥ ᐃᖃᐃᔭᐅᑎᒋᔭᐅᕙᒃᑐᓂ.